كتب الشاعر المبدع يحيى المنياوي نص بعنوان...... تعبت يامايا......
باللهجة العامية ( صعيد مصر )
تعبت يا مايا .................
مالك يا ولدي !!!
شايفك يا ولدي شايل الهم !!!
والله يا مايا صدقتي القول
شوفي أنا عايش بقالي كام حول
وأقول يمكن تتعدل الدنيا معاي وتتلم
فين يا مايا خالي وفين العم ؟؟
لفيت يا مايا الدنيا عرض وطول
ليه يا مايا يتبهدل إبن الأصول ؟؟
شوفي يا مايا.. من شيل الهم
من عروقي.. أهو نشف الدم
كفاية يا ولدي ..!!!!!!
يا ضنايا وسندي ..
يا حتة من قلبي
قلبي عليك أتوجع
وعنيا عليك ما سبوك
فاكر يا واد أبوك
هو مات صحيح
بس كان يا ولدي.. راجل مليح
مشي في طريقه ولا خاف ولا رجع
كان قلبه كيف الديابة
يا ولدي الدنيا قلابة
تلمع كيف الدهب
لكن يا ولدي معدنها صفيح
ومين يقدر يهرب من المكتوب
أرجع يا ولدي وتوب
وبأيدك أمسح دموعك
بالصبر خليك أيوب
إنسى الي فات
خليك يا ولدي في الي جاي
تعبت يامايا..
سنين في الغربة
كانوا معايا
والغربة کْربة
والمر كان هو دوايا
الناس لاموني
قالوا ليه تسافر ؟؟
خليك هنا حاول وعافر
قولتلهم والله ما كنت مسافر
غربتي كانت هِنا
ما شوفت يوم هنا
كدب.. وخداع.. وغش
أنا كنت زي طير من غير عش
ما صدقونيش يا مايا
قالوا ازاي غريب في بلدك
وسط ناسك وأهلك
قولت والله.. بابي عمره ما خبط
من بعد موت أبويا
شافوني بهلك
ولا حد مد أيده وقال إحنا أهلك
أو كان واقف معايا
أو خفف عني حزني وآسايا
والله تعبت يا مايا.............
بقلم / يحيى المنياوي
تعليقات
إرسال تعليق